Гэта памятнае месца непадалёк ад вёскі Касута Крывасельскага сельсавета вядомае не толькі мясцовым жыхарам. Тут былі расстраляны рэпрэсіраваныя, пра што нагадваюць усім, хто тут бывае, драўляныя крыжы ды тры валуны з надпісамі.
«Памяці ахвяр турмы ў Вілейцы, замардаваных у чэрвені 1941 г.» – такі надпіс зроблены на адным з валуноў. Адкрыццё памятнага знака адбылося на Дзяды ў 1991 годзе. Аўтарам помніка ахвярам рэпрэсій з’яўляецца Барыс Цітовіч.
– Нядаўна пад кіраўніцтвам сельвыканкама ў гэтым месцы праведзена добраўпарадкаванне, – расказала старшыня Крывасельскага сельсавета Алена Жук. – Тут заменены старыя крыжы на новыя, праведзены суботнік з удзелам работнікаў Рабунскай школы. Мы шчыра ўдячны за дапамогу ў гэтай патрэбнай усім нам справе Вілейскаму доследнаму лясгасу (менавіта гэтым калектывам выраблены новыя крыжы), а таксама СУП «Усходні-агра».
