Калі спяваюць жанчыны, на сцэне, здаецца, расцвітаюць кветкі. Напэўна, такім адчуваннем жылі ўдзельнікі святочнага канцэрта, што адбыўся напярэдадні Міжнароднага жаночага дня ў вілейскім Палацы культуры. Па традыцыі, большасць гледачоў склалі прадстаўніцы «слабай» палавіны насельнікаў горада.
Звыклым чынам гэта азначэнне мы заключаем у двукоссе. Бо паспрачацца з яго двухсэнсоўнасцю жаночы пол мае поўнае права. Дзякуючы канстытуцыйным паўнамоцтвам, згодна якіх жанчынам забяспечваецца прадастаўленне роўных з мужчынамі магчымасцей у атрыманні адукацыі і прафесійнай падрыхтоўкі, у працы і службовым росце і гэтак далей. «Слабай» палавіне гарантуецца права на яе духоўнае, маральнае і фізічнае развіццё.
Развіваючы тэму, старшыня райвыканкама Віктар Кот перавёў яе ў кантэкст прыкметнай ролі жанчыны ў развіцці вілейскага краю. Яе ўклад тым важкі, што ён грунтуецца на духоўных пачатках, на эмацыянальнасці жаночага сэрца, якому пад сілу любая ноша. Нярэдкія выпадкі, калі жанчына адыгрывае ў калектыве ролю лідара, з якой без ваганняў пагаджаюцца мужчыны.
Гістарычна, мы ведаем, свята з’явілася як дзень згуртавання жанчын у барацьбе за роўнасць правоў і эмансіпацыю. Сучасны свет спакваля згладжвае яго палітычны падтэкст. Гендарная палітыка Беларусі, напрыклад, калі меркаваць хоць бы па індэксу прысутнасці жанчын у органах дзяржаўнай улады, сведчыць аб прадвызначанай Канстытуцыяй роўнасці палоў. І сёння не гэта праблема хвалюе прыгожую палавіну. Яе заклапочанасць – лёс дзяцей, светлы, агораны бацькоўскім клопатам і дзяржаўнымі гарантыямі. Пазітыўныя змены ў дэмаграфічнай сітуацыі – гэта вынік схільнасці кіраўніка дзяржавы да дабрабыту шматдзетных сем’яў, да іх прыстойнага ўкладу жыцця.
Нядаўна ў бальніцы (усе мы не без хвароб) давялося пазнаёміцца з дзвюма прыемнымі дзяўчатамі, маладымі маці. Адна ўжо мае трох дзетак. Другая яшчэ чакае трэцяга. Па медыцынскаму прагнозу – хлопчыка. Што ўразіла, дык гэта аптымістычны настрой маладых маці. Адсутнасць скептыцызму да заканадаўчых навацый, уласцівых старэйшым пакаленням. Я маю на ўвазе тыя сацыяльныя моманты, якія сёння гарантаваны маладым сем’ям, што і ў складаны час рашаюцца на напружваючы подзвіг бацькоўства. І, няхай прабачаць мяне мужчыны, вызначальную роль яго, у абсалютнай большасці выпадкаў, бярэ на сябе жанчына-маці.
«Мы высока цэнім ваш актыўны ўдзел у справах краіны, неацэнны ўклад у выхаванне падрастаючага пакалення, захаванне традыцый і маральных каштоўнасцей». – Нездарма менавіта гэтымі словамі завяршыў Прэзідэнт Беларусі святочнае віншаванне з Днём жанчын, адрасаванае сваім суайчынніцам.
Марыя КУЗАЎКІНА.
Фото Алексея КАМИНСКОГО
