Ну і што тут дзіўнага, падумае нехта. І сапраўды, нічога, справа жыцейская. Ды ёсць два нюансы: таго дамафона ў нас ніколі і не было, а «майстры», што абяцалі яго памяняць, аж з Яраслаўскай вобласці.
Званок на мабільны, які мне паступіў на днях, адразу падаўся падазроным – на экране высвечвалася назва расійскай «фірмы». Малады чалавек на другім канцы провада жвава, як па-пісанаму (а дакладней, завучана, бо за дзень трэба абзваніць вунь колькі «кліентаў»), зарапартаваў: «У вас будут менять домофоны, поэтому вам нужно…» Не ведаю, што мне патрабавалася зрабіць, бо я перабіла «майстра»: «Дзе ў нас?».
«По адресу вашего фактического проживания», – тут жа пратарабаніў чалавек на тым канцы провада.
«Назавіце канкрэтны адрас, у мяне іх два», – удакладніла я. Голас суразмоўцы стаў настойліва-незадаволеным: «Я же сказал: по месту фактического проживания!».
«Назавіце канкрэтна!» – патрабавала я.
Карацей, не дамовіліся. Так і засталася я без дамафона, а нумар той «клапатлівай» службы выдаліла, каб болей не дакучаў.
Падобныя званкі з самых розных «службаў» паступаюць, відаць, усім нам. Звоняць «міліцыянеры», «банкіры», «паштавікі», «камунальнікі»… Ва ўсіх іх адна мэта – дапамагчы нам …аддаць ім свае грошы. І даволі часта махлярам гэта, на вялікі жаль, удаецца.
Па статыстыцы, за мінулы год агульны ўрон беларусаў ад дзеянняў злачынцаў з інтэрнэта склаў каля 54 мільёнаў рублёў. І гэта не канчатковая лічба, бо атакі сеткавых махляроў на сумленных людзей працягваюцца. Давайце будзем пільнымі!
Ірына БУДЗЬКО
