«Ад дзеда і ўнукаў – дзеткам навука» Пад такой назвай нядаўна выйшла ў свет адна з новых кніжак нашага вядомага земляка-пісьменніка Віктара КАЖУРЫ. І гэта не проста назва кніжкі…
Імя Віктара Кажуры, пісьменніка, настаўніка, даследчыка, добра вядома не толькі на Вілейшчыне, але і ва ўсёй Беларусі і нават за яе межамі. На старонках раённай газеты мы нярэдка расказваем пра шматгранную дзейнасць Віктара Віктаравіча: выдавецкую, даследніцкую, творчую, метадычную.
Па-добраму зайздросціш гэтаму няўрымсліваму чалавеку, міжволі задумваючыся: як ён знаходзіць на ўсё час і сілы? А пагутарыш з Віктарам Віктаравічам, убачыш той малады агеньчык творчасці ў яго вачах, пачуеш такія шчырыя, знаёмыя з дзяцінства словы нашай роднай мовы, і вось ён, адказ: вялікім багаццем – любоўю і веданнем усяго нашага, беларускага – валодае пісьменнік, шчыра дзеліцца гэтым з іншымі, і гэта дае сілы і натхненне.
Творчасць, якая натхняе
Мне вельмі падабаюцца творы Віктара Кажуры. Яго кніжкі чытаю з вялікім задавальненнем. Простыя, трапныя, напісаныя сакавітай мовай, яны зразумелыя кожнаму, незалежна ад узросту. А галоўнае – яны пра нашу Беларусь, пра ўсё і ўсіх, што нас акружае. Нават самыя звычайныя прадметы і з’явы, па-майстэрску апісаныя мастаком слова, успрымаюцца ў нейкім новым святле, цікава і непаўторна.
Пісьменнік, педагог, даследчык, краязнаўца… Віктара Кажуру ведаюць ва ўсіх гэтых іпастасях. І вельмі важна, што творчы чалавек усім, што ведае і любіць, дзеліцца з моладдзю, выхоўваючы сабе дастойную змену.
Унукі – працяг справы
Сярод яго шматлікіх вучняў – унукі Ангеліна Прохарава і Цімафей Зеньчык. Гэта яны ў свой час натхнілі дзядулю на напісанне першых кніжачак для дзяцей. Натхняюць і зараз, а Ангеліна ўжо даволі часта выступае ў суаўтарстве з Віктарам Кажурам пры напісанні кніжак, працуе пад яго кіраўніцтвам над даследчыцкімі работамі.
Плённы навучальны год
Вельмі плённым для Віктара Кажуры і Ангеліны Прохаравай быў 2025–2026 навучальны год. Дзяўчына станавілася пераможцай шматлікіх конкурсаў розных узроўняў (ад раённых да міжнародных), неаднаразова разам з дзядулем выступала на Беларускім радыё і тэлебачанні, і пра ўсе гэтыя перамогі мы расказвалі нашым чытачам.
Думаецца, кожны ўпэўніўся, што зерне вялікай любові да бацькаўшчыны і роднай мовы, пасеянае дзядулем, ужо дало свае ўзыходы. Цяпер ужо атрымліваецца і сапраўды так: ад дзеда і ўнукаў – дзеткам навука. Дзеткам, якія чытаюць кнігі пісьменніка і яго паслядоўнікаў.
Новыя кнігі
Дарэчы, пра кнігі. У мінулым навучальным годзе ўбачылі свет пяць новых кніжак Віктара Кажуры (дзве з іх напісаны ў суаўтарстве з Ангелінай Прохаравай):
-
«Энцыклапедыя юнага этнографа»
-
«Дзівы-таямніцы роднага слова»
-
«Падказкі для казкі»
-
«Тыя – ды не тыя. Жукі»
-
«Ад дзеда і ўнукаў – дзеткам навука»
Гэтыя кніжкі сталі добрым творчым падарункам юным удзельнікам конкурсу «Бусляня».
Замест заключэння
У нашага творчага земляка мноства задумак і планаў, якія ён абавязкова ажыццявіць. І будуць новыя даследніцкія работы, перамогі, кніжкі пра роднае, беларускае. Яны абавязкова будуць, бо ярка гарыць у вачах Віктара Кажуры той агеньчык творчасці.
Ірына БУДЗЬКО/ Фота прадастаўлена Віктарам КАЖУРАМ
