Замест ложкаў – спальныя мяшкі, замест газавай пліты – вогнішча, замест камп’ютараў – песні пад гітару. Менавіта ў такіх умовах моладзь Вілейшчыны жыла ў Любанскім раёне з 11 па 13 жніўня на моладзевым фестывалі «Васільковы вянок” актыву Мінскай абласной арганізацыі ГА “БРСМ”. Праўда, шкадаваць пра адсутнасць выгод цывілізацыі і сумаваць ім не было калі. Кожны дзень быў распісаны па хвілінах, каб прадэманстраваць свае спартыўныя дасягненні, весела правесці час і вызначыць самую актыўную каманду фестывалю. У складзе нашай каманды «Вілія» былі прадстаўнікі Вілейскага раённага аддзела па надзвычайным сітуацыям, ААА «Новая Любанія», Вілейскага РЭС, аддзела ідэалагічнай работы, культуры і па справах моладзі, аддзела адукацыі, спорту і турызму, а таксама райкама БРСМ.
Праграма фестывалю была насычанай і цікавай: творчыя конкурсы, спартыўныя спаборніцтвы, інтэлектуальны конкурс «Галоўныя думкі», конкурс «Гiмн фестывалю», конкурс прыгатавання страў «Родны смак» і іншыя.
– Нам вельмі спадабаўся фестываль: перамена дзейнасці, новыя знаёмствы, цікавая праграма, вясёлыя конкурсы, – падзяліліся ўражаннямі вілейскія ўдзельнікі. – Мы праявілі свае акцёрскія здольнасці (хтосьці нават не здагадваўся пра свой талент), паказалі нядрэнную фізічную падрыхтоўку. Правесці час у добрай кампаніі на прыродзе – што можа быць лепшым? Агульная добрая справа ў момант аб’ядноўвае, робіць нас сябрамі, дае імпульс цікавым пачынанням. І мы ў чарговы раз паказалі, якая актыўная наша моладзь, творчая, улюбёная ў родны край.
У спартыўнай частцы праграмы фестываля віляйчане занялі два прызавыя месцы. Іван Пагуда, Сямён Субач, Яўген Канапелька і Вольга Арловіч ў паласе перашкод сярод каманд-удзельніц занялі другое месца, уступіўшы толькі камандзе з Любаншчыны. А Дзяніс Несцяровіч у спаборніцтвах па рыбнай лоўлі “Багаты ўлоў” – трэцяе.
– За адну гадзіну мне ўдалося злавіць тры кілаграмы рыбы, – падзяліўся Дзяніс. – Мне пашанцавала, не было зрываў, зачэпаў, сходаў, і часу я не страціў на перааснасцы. Лавілася выдатна, падкарміў, пачакаў, і вада пачала бурліць каля падкормкі, кручок цалкам хаваў у кансерваванай кукурузе і толькі паспяваў закідваць. Закінуў, пачакаў хвіліну, падсечка, і вывуджваеш.
–Ва ўсіх конкурсах мы стараліся выступіць добра. І як вынік – 8-е агульнакаманднае месца, – падзяліўся ўдзельнік каманды Яўген Канапелька. – Дзякуй усім за аптымізм і гумар, волю да перамогі, згуртаванасць, праяўленыя на спартыўных і культурна-масавых этапах. Бо на турзлёце вельмі важна, каб каманда была дружнай і арганізаванай. А наша каманда аказалася менавіта такою. Яркімі і насычанымі сталі для мяне гэтыя тры дні фестывалю. Дзякуючы працы арганізатараў і суддзяў турслёт прайшоў на высокім узроўні і прынёс усім шмат станоўчых эмоцый.
–Фестываль «Васільковы вянок» пакінуў шмат уражанняў і эмоцый для нашай каманды, – адзначыў яшчэ адзін удзельнік вілейскай каманды Сямён Субач. – Я на такім злёце – упершыню. З першага дня фестывалю наша каманда пачала праяўляць актыўнасць: мы падтрымлівалі і хварэлі за іншыя каманды, танцавалі, зарадзіліся пазітывам і самае галоўнае – з’ядналіся.
Найбольш пашансавала “Віліі” ў творчым конкурсе “Гімн фестывалю”. Тут Анастасія Чарняўская, Алена Руткевіч і Канстанцін Іваноў прынеслі камандзе першае месца.
– Я не ўпершыню апынулася на такім турыстычным свяце, яно пакінула шмат прыемных успамінаў і ўражанняў, – адзначыла Анастасія Чарняўская, капітан каманды “Вілія” і першы сакратар РК ГА “БРСМ”. – Капітанская пасада – справа адказная, наладзіць каманду, падбадзёрыць. І сама з задавальненнем удзельнічала ў конкурсах. Наша каманда – дружная, згуртаваная, падтрымлівалі адзін аднаго ў спаборніцтвах. Вечарамі рыхтаваліся да конкурсаў, спявалі песні пад гітару, знаёміліся з суседзямі па палатачным гарадку, танцавалі. Тры дні праляцелі хутка, мы нават крыху пасумавалі, што ўсё скончылася. У наступным годзе абавязкова зноў пабываем на “Васільковым вянку”.
Усяго ў фестывалі ў гэтым годзе прымалі ўдзел 13 каманд з усёй вобласці. У агульным заліку ўсіх спаборніцтваў перамогу раздзялілі каманды Клецкага і Мінскана раёнаў, трэцяе месца ў Салігорскага.
Кацярына КАРПІК.
Фота прадстаўлена РК ГА “БРСМ”
