У мінулую пятніцу вобласць ушаноўвала лепшых хлебаробаў і ўсіх тых, хто працуе ў аграпрамысловым комплексе. Працаўнікоў сельскагаспадарчай галіны Чэрвеньскага, Пухавіцкага, Крупскага, Уздзенскага, Бярэзінскага, Старадарожскага, Лагойскага і Мя-дзельскага раёнаў запрасілі ў святочна ўпрыгожаную залу сярэдняй школы № 5, у якой адбылася цырымонія ўручэння II і III прэмій пераможцам Мінскага абласнога фестывалю-кірмашу «Дажынкі-2015». Сярод іх – рэкардсмены хлебных ніў і тыя, хто вызначыўся на корманарыхтоўках, лепшыя жывёлаводы, адукаваныя спецыялісты і таленавітыя кіраўнікі.
Урачыстае мерапрыемства адкрыў прывітальным словам начальнік Галоўнага фінансавага ўпраўлення Мінскага абласнога выканаўчага камітэта Мікалай Кухавец. Мікалай Мікалаевіч ад імя губернатара Міншчыны Сямёна Шапіры павіншаваў удзельнікаў абласнога свята «Дажынкі-2015» з Днём работнікаў сельскай гаспадаркі і перапрацоўчай прамысловасці і падзякаваў за іх нялёгкую, але вельмі адказную і важную працу па забеспячэнні харчовай бяспекі краіны.
– Свята дажынак – адно з самых паважаных свят у нашага народа. І мы аддаем даніну павагі працы вяскоўцаў, якія вырасцілі добры ўраджай, убралі яго з мінімальнымі стратамі, нягледзячы на цяжкасці, якія часам стварала нам надвор’е. Жадаю вам на будучыню яшчэ больш высокіх вынікаў, здароўя і ўдачы.
Пад музыку і апладысменты Мікалай Кухавец уручыў узнагароды пераможцам абласнога працоўнага спаборніцтва за дасягненні высокіх паказчыкаў на ўборцы ўраджаю збожжавых і зернебабовых культур сярод камбайнераў, вадзіцеляў, за дасягненні высокіх паказчыкаў на сушцы збожжа, насення, масла, насення рапсу сярод старэйшых аператараў збожжаачышчальна-сушыльных комплексаў, за дасягненні высокіх паказчыкаў на нарыхтоўцы травяных кармоў сярод камбайнераў.
Віншавальную эстафету працягнуў намеснік старшыні Мінскага абкама прафсаюза работнікаў аграпрамысловага комплексу Пётр Окунеў. Пётр Максімавіч прывітаў усіх і павіншаваў з прафесійным святам. Ён зазначыў, што тыя ўзнагароды, якія былі ўручаны, сведчаць аб тым, што сапраўды працаўнікі Мінскай вобласці годна завяршаюць год.
– Упэўнены – гэта не мяжа. Калі будзеце і далей працаваць з поўнай аддачай, тады гэты вынік заўсёды памножыце. Жадаю, каб вы пераадолелі ўсе перашкоды і цяжкасці на сваім шляху, а таксама здароўя, цярпення і мудрасці.
Праграму ўрачыстасці завяршыў святочны канцэрт «Славім хлеб і рукі залатыя».
Кацярына КАРПІК.
Фота аўтара
