Удзяляць большую ўвагу працаўнікам сяла, занятым у жывёлагадоўлі аграпрамысловага комплексу, – гэта галоўная мэта рэспубліканскай прафсаюзнай акцыі «Наш жывёлавод», якая праходзіць у краіне. Што і казаць, заслужылі вяскоўцы такой увагі, сваёй нялёгкай працай заслужылі.
На днях у рамках акцыі на Вілейшчыну наведаўся галоўны тэхнічны інспектар працы Аляксандр Мотуз, які выканаў прыгожую місію: уручыў падзячныя пісьмы і грашовыя прэміі Мінскага абласнога камітэта прафсаюзаў АПК лепшым працаўнікам жывёлагадоўлі ААТ «Нарачанскія зоры». Былі адзначаны аператары машыннага даення малочнатаварных фермаў «Нарач» і «Канстанполле» Вольга Ардаш і Марыя Ляошка, а таксама жывёлавод малочнатаварнай фермы «Бараўцы» Аляксандр Ільін.
Не застаўся ў баку ад акцыі і раённы камітэт прафсаюза работнікаў аграпрамысловага комплексу: галоўны бухгалтар райкама Марына Горбач уручыла прэміі яшчэ пяці працаўнікам жывёлагадоўчай галіны «Нарачанскіх зораў».
Ірына БУДЗЬКО.
Фота Аляксея КАМІНСКАГА
