Надзіва цёплае і запамінальнае мерапрыемства прайшло ў мінулую суботу ў нашым класе. Яно было прымеркавана да Дня маці, таму менавіта жанчынам адводзілася галоўнае месца. Нашы дзеці, мы, мамы, і нашы матулі – тры пакаленні сабраліся разам, і ўсім нам было весела і цікава.
Спачатку ў спартыўнай зале гімназіі прайшло забаўляльна-спартыўнае спаборніцтва дзвюх каманд пад прыгожымі назвамі «Камета» і «Страла». Трэба было бачыць, як горача падтрымлівалі ўнукі сваіх мам і бабуль і наадварот. Трэба сказаць, што бабулі ўбачыліся хлопчыкам і дзяўчынкам з новага боку, зусім не такімі, як звычайна – ля пліты ці з вязаннем у руках. Апранутыя па-спартыўнаму, яны ўдзельнічалі ў цікавых конкурсах, здабываючы ачкі для сваіх каманд. Стараліся ўсе, таму і пераможцамі ў выніку сталі абедзве каманды.
А затым усе разам – дзеці, мамы, бабулі і класны кіраўнік Валянціна Аляксандраўна Епіхава – сабраліся за салодкім сталом. Было цёпла не толькі ад гарачага чаю, але і ад самой атмасферы дабрыні, узаемаразумення і павагі. Людзі розных пакаленняў, мы знайшлі агульныя тэмы для размоў: гаварылі пра выхаванне, вучобу, працу, дзяліліся цікавымі рэцэптамі і ўражаннямі ад класнага мерапрыемства. Асабліва важна было пачуць меркаванне аб ім бабуль. І яны аднагалосна адзначылі, што такія цёплыя сямейна-школьныя сустрэчы вельмі важныя. Яны не проста даюць магчымасць бліжэй пазнаёміцца, з карысцю правесці час, але і аб’ядноўваюць усіх нас, робяць мацнейшымі нашы сем’і. Дзякуй за цікавае мерапрыемства нашай паважанай Валянціне Аляксандраўне і за актыўны ўдзел у ім – нашым дарагім мамам і бабулям. Было і сапраўды вельмі цікава і весела.
Ад імя вучняў 4 «Б» класа гімназіі № 2 і іх бацькоў Святлана БУДЗЬКО.
Фота прадастаўлена аўтарам