Не сакрэт, што, дасягнуўшы пенсійнага ўзросту, чалавек адрываецца ад працоўнага калектыву, абмяжоўваецца асабістымі і хатнімі клопатамі. Больш гэта датычыцца жыхароў сельскай мясцовасці, асабліва малых вёсак. Каб зрабіць жыццё сталых людзей больш разнастайным і крэатыўным, не пакінуць іх без увагі, чатыры гады назад, у снежні 2009 года, пачала сваю работу валанцёрская група вёскі Даўгінава ў рамках праекта «Ружа вятроў». За гэты перыяд цеснай сувязі з Даўгінаўскім СДК, бібліятэкай, музычнай школай было праведзена шмат мерапрыемстваў.
І ў бягучым годзе валанцёры прынялі ўдзел у правядзенні свята вёскі Еськаўка, у святкаванні дня пажылых людзей, у арганізацыі свята хлебаробаў «Дажынкі для пенсіянераў”.
А зараз хачу ўзгадаць кожнае з гэтых мерапрыемстваў.
Свята вёскі Еськаўка надоўга запомніцца ўрачыстасцю, гасціннасцю і актыўнасцю яе жыхароў. Усе гаспадары сядзіб падрыхтаваліся да ўдзелу ў конкурсе на лепшы падворак, чыталі вершы і байкі, спявалі, дзякавалі арганізатарам мерапрыемства, артыстам дома культуры, загадчыку аўтаклуба Сяргею Рудніцкаму, валанцёрам Галіне Дзевяцень і Тамары Брыцько.
Пазней у Даўгінаўскім СДК было наладжана святочнае мерапрыемства «Няхай старасць будзе ў радасць», дзе пажылыя пенсіянеры змаглі паслухаць літаратурна-музычную кампазіцыю, атрымаць віншаванні, паспяваць і патанцаваць, адпачыць.
А нядаўна адбылося, стаўшае ўжо традыцыйным, мерапрыемства «Дажынкі для пенсіянераў», якое збірае былых працаўнікоў саўгаса «Даўгінава» з усіх навакольных вёсак. Як прыемна было бачыць на нашым свяце паважаных ветэранаў працы шаноўнага ўзросту і павіншаваць іх: старэйшую паляводку з Сасноўшчыны Лазовік Леаніду (з 85-годдзем), былога майстра-наладчыка з Апенек Шостака Пятра (з 80-годдзем), былую даярку з Еськаўкі Нупрыёнак Ганну (з 75-годдзем), а таксама даўгінаўскіх жыхароў Шаўцову Марыю, Валковіч Зою, Дзевятня Віктара, Рачыцкую Галіну з іх прыгожымі юбілеямі.
Віншаванні і падарунак атрымала і Ляшковіч Алена, якая шмат год працавала бухгалтарам, а ў гэтым годзе папоўніла рады пенсіянераў. Даўгінаўскія культработнікі пастараліся, каб падрыхтаваць цікавую музычную праграму, каб іх музычныя віншаванні былі сапраўдным падарункам для юбіляраў. Яны зноў запрасілі на свята загадчыка аўтаклуба Сяргея Рудніцкага, каб прысутныя змаглі паслухаць песні ў яго выкананні, а таксама і паспяваць пад акампанемент яго баяна.
Члены нашай валанцёрскай групы за гады сумеснай дзейнасці сталі сапраўдным сяброўскім калектывам, мы разам у святы і юбілеі, мы падтрымліваем адзін аднаго словамі спачування ў цяжкія хвіліны.
Вось і на гэты раз быў выдатны момант, каб павіншаваць Дзевяцень Галіну і яе мужа Віктара з іх рубінавым вяселлем. Яны самыя актыўныя арганізатары ўсіх валанцёрскіх спраў, удзельнікі мастацкай самадзейнасці мясцовага СДК, якія не шкадуюць ні сіл, ні часу, ні сродкаў для арганізацыі адпачынку пенсіянераў. Урачыстую рэгістрацыю рубінавага шлюбу здзейсніла кіраўнік справамі сельвыканкама Галіна Ханашчак, якая заўсёды знаходзіць час, каб прыняць удзел у нашых мерапрыемствах.
«Маладыя» прымалі віншаванні, кветкі і падарункі ад сяброў і культработнікаў. Усіх прысутных кранулі пяшчота і павага, якую Віктар і Галіна Дзевятні пранеслі разам усё сумеснае жыццё, а таксама тыя песні і вершы, якія яны прысвяцілі адзін аднаму.
Усе жадаючыя змаглі прыняць удзел у конкурсе «Народны артыст», пацешыць прысутных сваімі песнямі, вершамі, танцамі.
Старэйшае пакаленне хлебаробаў шмат зрабіла, каб сёння на нашых сталах быў духмяны каравай хлеба. Караваем віталі гасцей і на нашым свяце, пасля падзялілі паміж усімі і падалі да стала.
І арганізатары, і госці мерапрыемства вельмі ўдзячны старшыні Даўгінаўскага сельсавета Аляксандру Маліноўскаму і гаспадару прыватнага магазіна «Крыніца» Руслану Станкевічу за аказаную матэрыяльную падтрымку. Няхай ім заўсёды спадарожнічае поспех у іх справах
Кацярына Валуева, валанцёр, бібліятэкар Даўгінаўскай бібліятэкі
