Ведаем, што ніхто нам пад’езд не адрамантуе, таму вырашылі сваімі сіламі

Мы жывём на вуліцы Гагарына. Наш дом пабудаваны даўно, 42 гады таму. Капітальны рамонт не праводзіўся. Чакаем 2018 года,  у якім яго абяцаюць.

Хачу сказаць аб стане нашага шостага пад’езда. Дзякуючы зацікаўленасці саміх жыльцоў, ён знаходзіцца ў добрым стане. Мы ведаем, што ніхто нам яго не адрамантуе. А таму вырашылі гэта рабіць самі. Жыхары  кожнага паверха сваімі сіламі і матэрыяламі пафарбавалі панэлі на сценах і лесвіцу ў пад’ездзе.  На вокнах павесілі фіранкі. На чацвёртым паверсе жыве аматарка чысціні і прыгажосці Шаблоўская Галіна Юльянаўна. У яе шмат кветак у кватэры. Нямала іх упрыгожвае і лесвіцу. Цвітуць герані, кітайская ружа і іншыя.

Падтрымліваем самі чысціню, не чакаем прыбіральшчыцы. Дзеці і тыя не кінуць нават паперкі. Хто б чужы ні зайшоў у пад’езд, абавязкова адзначыць, што ў нас парадак, чысціня і  прыгажосць. Чытала, што ў Маладзечна прайшоў конкурс па добраўпарадкаванні і лепшым пад’ездзе, райвыканкам абяцаў грашовую прэмію.  Можа, і ў нас такое праводзіць?  Гэта заахвоціць людзей рабіць рамонты ў пад’ездах і наводзіць прыгажосць.

Галіна КАПЦЮГ,  жыхарка д. № 13, вул. Гагарына.
Фота Аляксея КАМІНСКАГА