Як не дзіўна, але на бярозах, што карагодзяцца па перыметру дзіцячага аздараўленчага цэнтра «Надзея», лістота ўцалела. Адліваючы медзяным водсветам, яна вядзе доўгую гамонку з ветрам, напевы якога напоўнены ашчаднасцю і пяшчотай. Гэту асаблівасць мясцовага пейзажу адразу заўважылі журналісты, прадстаўнікі рэспубліканскіх і рэгіянальных сродкаў масавай інфармацыі, – удзельнікі своеасаблівага прэс-тура па Вілейшчыне. Забягаючы наперад, адзначу, што наш край уразіў тых, хто трапіў сюды ўпершыню. Сваім прыродным каларытам, людской гасціннасцю, вытворчым патэнцыялам. Падобнага роду ваяжы традыцыйна папярэднічаюць прэс-канферэнцыям, якія рэгулярна праводзіць з мас-медыя старшыня абласнога выканаўчага камітэта Сямён Шапіра. Такое мерапрыемства адбылося ў мінулую сераду на Вілейшчыне. Дзіцячы аздараўленчы цэнтр, які зусім нядаўна адзначыў сваё 20-годдзе, быў першым у маршрутнай карце ўдзельнікаў прэс-тура. Журналістаў прыемна здзівілі шматвектарныя накірункі дзейнасці і развіцця дзіцячай установы. На іх падрабязна спыніўся дырэктар цэнтра Вячаслаў Макушынскі. Аздараўленне і выхаванне дзяцей з тэрыторый, забруджаных радыёнуклідамі, – вызначальны напрамак работы Цэнтра. Яму падпарадкаваны ўсе астатнія. Гэта і вырошчванне экалагічна чыстай прадукцыі, і мэтанакіраваная, плённая праца па энергазберажэнню, і камерцыйная дзейнасць, што дазваляе мець сродкі на развіццё. Многімі арыгінальнымі навацыямі ўстановы здзівіў і зацікавіў журналістаў Вячаслаў Макушынскі. Некаторыя выказвалі жаданне прыехаць сюды яшчэ раз, каб больш падрабязна ўнікнуць у клапотнае і такое ўнікальнае па сваёй змястоўнасці жыццё Цэнтра.
Безумоўна, нікога не пакінула раўнадушным Заброддзе, напоўнены аўрай высокага духоўнага кшталту куточак вілейскай зямлі. Менавіта там, у адноўленай памяці пра вялікі подзвіг і самаахвяраванне бацькоў – наша спадчына. Цені мінулага абуджаюць людскую свядомасць, вымушаюць дбаць аб тым святым і запаветным, што мы пакінем нашчадкам. Мае рацыю Валянціна Цітовіч (яна сустрэла гасцей у вобразе сястры міласэрнасці часоў Першай сусветнай вайны), калі гаворыць пра непераходзячую вартасць памяці.
Барыс і Валянціна Цітовічы, заснавальнікі дабрачыннага фонду «Крокі», уразілі журналістаў сваім бескарыслівым падзвіжніцтвам у імя ідэі. Былі нікім не абвешчаныя хвіліны маўчання ў царкве Барыса і Глеба. Калі прысутныя моўчкі запальвалі свечкі, адчуваючы сябе ўдзельнікамі кранаючай дзеі вяртання ў мінулае, датыкнення да каранёў, на якіх сёння расце і гартуецца патрыятызм славянства.
Эмоцыі іншай якасці атрымалі прадстаўнікі СМІ пры наведванні прадпрыемстваў дрэваапрацоўкі – завода будаўнічых дэталей і мэблевай дабрыні. Першае прадпрыемства ўжо тры гады, як выйшла на рынак з новай гандлёвай маркай «Vilario». Як адна са з’яў мадэрнізацыі – інвестыцыйны праект з арганізацыяй новай вытворчасці выпуску паліўных брыкетаў. На яго выдаткавана 3,6 мільёна долараў ЗША. Наогул жа, усе мерапрыемствы па мадэрнізацыі ажыццяўляюцца за кошт уласных сродкаў акцыянернага таварыства, – такую інфармацыю паведаміў журналістам яго дырэктар Сяргей Жук. Экскурсія пачалася ад Дошкі гонару, якая служыць не толькі каларытным аб’ектам вытворчага дызайну, але і дэманструе наяўны працоўны патэнцыял прадпрыемства. Дзе выпускаецца прадукцыя высокай якасці і сучаснага дызайну. Дзякуючы пастаяннаму ўдасканальванню тэхналогій, мадэльны рад міжпакаёвых дзвярэй, асноўнага вырабу буддэталеўцаў, дастаткова шырокі, разлічаны на розныя густы. Буйнейшы экспарцёр раёна, завод будаўнічых дэталей штомесяц у сярэднім 42,7 працэнта сваіх вырабаў адпраўляе на рынкі блізкага і далёкага замежжа.
Асноўныя адрасы паставак прадукцыі вілейскіх мебельшчыкаў – Расія, Казахстан, Грузія, краіны Балтыі, Бельгія, Чэхія, Турцыя, Польша, Францыя. Прадпрыемства таксама развіваецца за кошт уласных сродкаў. Мікалай Піскуноў, дырэктар мэблевай фабрыкі, пазнаёміў журналістаў з галоўнымі напрамкамі яе развіцця, інвестыцыйнай палітыкай, перспектывай. Апошняя – у пастаяннай тэхнічнай пераўзброенасці, нарошчванні экспарту. Трэба адзначыць, што ў асартыменце, які пастаянна абнаўляецца, звыш 350 відаў і мадыфікацый вырабаў, што ўлічваюць тэндэнцыі сучаснай мэблевай моды. Каларытныя сюжэты вілейскага краю ўразілі прадстаўнікоў СМІ, даўшы новы штуршок журналісцкаму пошуку ў плане перспектывы развіцця яшчэ аднаго рэгіёна Міншчыны.
Пра сучаснае на Вілейшчыне ў кантэксце будучага расказалі журналістам падчас прэс-тура старшыня райвыканкама Віктар Кот і яго намеснікі Генадзь Касцевіч, Святлана Дзяруга.
Марыя КУЗАЎКІНА.
На здымках: моманты прэс-тура.
Фота аўтара
