23 студзеня 2015 года, а 15 гадзіне ў зале выстаў краязнаўчага музея адбудзецца адкрыццё выстаўкі “Вілейскія далягляды” творчай суполкі мастакоў “Адраджэнне”
Вілейскі край багаты сівымі легендамі і паданнямі. Яго гісторыя насычаная і змястоўная. Многія векапомныя падзеі, якія адбываліся на Беларусі, пакінулі свой след і на берагах Віліі. З кожным годам Вілейка становіцца ўсё больш сучасным горадам, але ў ім цудоўна захоўваецца даўняя архітэктура на старых вуліцах. Вельмі маляўнічы і сам горад і яго наваколле.
Менавіта з Вілейкі распачынае сёлета сваю выставачную дзейнасць мастацкая суполка “Адраджэнне”, у склад якой ўваходзяць жывапісцы, графікі, майстры дэкаратыўна-прыкладнога мастацтва з Мінска і Узды: Андрэй Лычкоўскі, Фёдар Ладуцька, Яўген Шунейка і Уладзімір Сайко. Ужо некалькі год запар яны вандруюць па Беларусі і праводзяць свае сумесныя выстаўкі ў Полацку, Крычаве, Лідзе, Слоніме і іншых раённых цэнтрах нашай краіны.
Выставы мастакоў носяць эстэтычна-асветніцкі характар, яны на сваіх палотнах паказваюць багацце тэм і сюжэтаў нашай гісторыі і сучаснасці, акцэнтуюць увагу на разнастайнасці прыродных матываў.
У прадстаўленай экспазіцыі знойдзе сваё месца тэматыка Першай сусветнай вайны, лінія фронта якой праходзіла па вілейскай зямлі. Ёсць сярод твораў і вобраз вялікага мастака-рэфарматара Уладзіслава Страмінскага, які тут перажыў актыўны перыяд сваёй творчасці. А таксама шэраг пейзажных твораў, што з’яўляюцца вынікам смелых каларыстычных і тэхнічных эксперыментаў на падставе працы з натуры, на чыстым паветры на працягу аднаго сеанса.
Як ганаровы госць суполкі ў выстаўцы прымае ўдзел мастачка Вольга Гацко, родам з Радашковіч. За яе плячыма — вучоба ў мастацкім інстытуце па спецыяльнасці “мастацтвазнаўства”. Але апошнім часам яна актыўна займаецца дэкаратыўным жывапісам у жанры нацюрморта і пейзажа.
Усе хто хоча пазнаёміцца з творчасцю суполкі мастакоў “Адраджэнне” чакаем 23 студзеня 2015 года а 15 гадзіне па адрасу г. Вілейка пл. Свабоды,1 зала выставак імя Н.Ю. Сілівановіча.
Навуковы супрацоўнік ДУ “ВКМ” Аўдзей Н.В.
