У мінулаю сераду гасцінна расчыніла свае дзверы аматарская выстава «Зімовыя фантазіі», размешчаная ў выставачнай зале Вілейскага краязнаўчага музея. Выстава ўяўляе сабой калейдаскоп работ створаных дзецьмі і людзьмі сталага ўзросту, прысвечаных калядам. Дызайнерскія елкі, калядныя цацкі, паштоўкі — усё гэта створана рукамі аматараў.
Падчас адкрыцця выставы наведвальнікі паўдзельнічалі ў стварэнні адвент-каляндара — гэта спецыяльны каляндар, які паказвае час, застаўшыся да свята Каляд альбо Новага года.
Спачатку ён прызначаўся для дзяцей і надаваў магчымасць зрабіць кожны дзень падрыхтоўкі да каляд і новага года асаблівым, незвычайным і радасным. Што можа быць цікавей, чым раніцай бегчы да адвент-каляндара і знайсці там чарговы сюрпрыз, заданне альбо падарунак. З цягам часу традыцыя трансфармавалася і для дарослых.
Удзельнікам мерапрыемства было прапанавана на картках напісаць жаданне альбо важную справу, якую абавязкова трэба зрабіць да Новага года і пакласці ў канверт, які адносіцца да пэўнага дня.
Падчас выставы людзі сталага ўзросту з вялікім імпэтам распавядалі пра свае захапленні. Адзначалі яны і тое, што вельмі любяць збірацца і праводзіць свой вольны час разам. Творчасць аб’ядноўвае і дае магчымасць кампенсаваць «дэфіцыт адносін».
Атрымаць задавальненне ад наведвання выставы можна да 8 студзеня 2017 года.
Як кажуць, ніколі не позна адкрыць у сябе таленты!
Вольга ЗЕНЮК.
Фота аўтара
