Максім Танк і вілейскі ўспамін
Восенню 1939 года ў Вілейку прыехаў паэт Максім Танк (Яўген Скурко). Яму было 27 гадоў. Але яго ведалі як аўтара шэрагу кніг. Пры сабе меў пісталет, які забраў у польскіх памежнікаў. Патрэбы ў ім вялікай мо і не было. Таму хутка здаў зброю.
Прыехаў у Вілейку на працу ў аддзеле асветы. Аддзел асветы ледзьве не праз некалькі дзён змяніў на рэдакцыю газеты “Вілейская праўда”. У рэдакцыі працавала і паэтава будучая жонка – Любоў Асаевіч.
Год Максім Танк правёў у Вілейцы. Гэта быў ці не самы складаны перыяд у жыцці. Пад уладай Саветаў уз’ядналася Беларусь, чаго ён так прагнуў. А аднымі з ахвяраў новага рэжыму сталі бацькі паэта. Было прынятае рашэнне аб іх раскулачванні. Ім пагражала высылка.
Пагроза арышту навісла і над самім Танкам. У канцы кастрычніка 1940 г. паэт пакінуў Вілейку – пераехаў у яшчэ беларускі Беласток.
Сям’ю паэта не рэпрэсавалі – Танк дагрукаўся да высокіх начальнікаў. Самога таксама не арыштавалі, хоць такая верагоднасць захоўвалася яшчэ і пасля вайны.
Але з Вілейкі ён усё-ткі вывез адзін, як мінімум, пазітыўны ўспамін. У чэрвені 1940 г. Яўген і Любоў пабраліся шлюбам. Распісаліся толькі – святкавання не было…
У наш горад Максім Танк вяртаўся хіба толькі аднойчы. Гэта была вымушаная паездка да доктара з хворай дачкой. Магчыма, не было проста іншай нагоды. А мо і не хацеў успамінаць той страшны час, пра які ў Вілейцы нагадвала б усё.
На фотаздымках – Максім Танк і яго жонка Любоў Скурко (Асаевіч), якімі яны былі ў Вілейцы, а таксама больш позняе сумеснае фота; дакументы з пачатку 1940-х.
Источник: Вілейскі-Павет Гадавік-Лакальнай-Гісторыі
