З 21 па 28 снежня сумесная акцыя выратавальнікаў і работнікаў лясгаса «Дорым ёлку знаўцам пажарнага толку!» пройдзе ў Вілейскім раёне.
Каб атрымаць бясплатна навагоднюю прыгажуню, якая напярэдадні святаў павінна пасяліцца ў кожным доме, жыхарам раёна неабходна будзе адказаць на пытанні ў галіне бяспекі. Такім чынам арганізатары акцыі вырашылі не толькі стварыць настрой, але і нагадаць дарослым і дзецям аб жыццёва важных правілах.
Акцыя будзе праходзіць на працягу гадзіны з 17.00 да 18.00 21, 26 і 28 снежня на ёлачным базары цэнтральнай плошчы.
Дзед Мароз таксама вырашыў далучыцца да бяспечнай справы і наведае некаторыя сем’і. Ён завітае ў госці і падорыць ёлкі тым, у чыіх дамах зіхацяць гірлянды, але не іскрацца разеткі, у чыіх сем’ях цяпло ад кахання, але не ад перагрэтай печы, у чыіх дамах жыве не толькі Дамавік, але і выратавальны захавальнік хатняга ачага — аўтаномны пажарны апавяшчальнік.
Вілейскі РАНС
