13 снежня 2016 года начальнікам аддзела архітэктуры і будаўніцтва Вілейскага райвыканкама – галоўным архітэктарам Вілейскага раёна назначаны Гарланаў Дзмітрый Сяргеевіч.
Дзмітрый Сяргеевіч Гарланаў нарадзіўся ў 1991 годзе ў г. Бабруйску Магілёўскай вобласці. У 2014 годзе скончыў Беларускі нацыянальны тэхнічны ўніверсітэт па спецыяльнасці архітэктура. Пасля заканчэння ўніверсітэта быў накіраваны галоўным спецыялістам аддзела архітэктуры і будаўніцтва Вілейскага райвыканкама, дзе і працаваў да назначэння на новую пасаду.
Дзмітрый Гарланаў актыўна праявіў сябе пры падрыхтоўцы горада да абласных Дажынак-2015, якія праходзілі ў г. Вілейка. Ён таксама з’яўляецца аўтарам праекта рэканструкцыі былой танцпляцоўкі пад сучасны Скейт-парк, а таксаама шэрагу іншых праектаў.
Нагадаем, што Дзмітрый Гарланаў змяніў на пасадзе галоўнага архітэктара Вілейскага раёна Галіну Кажарновіч, якая працавала ў Вілейскім раёне з 1980 года. Увесь яе працоўны шлях звязаны выключна з архітэктурай: з 1983 па 1987 гады яна працавала старшым інжынерам вытворчай групы пры галоўным архітэктары горада Вілейскага гарвыканкама, затым кіравала гэтай групай. З 1987 па 1990 гады Галіна Кажарновіч — галоўны архітэктар Вілейкі, пасля яна ўзначаліла аддзел архітэктуры, якім кіравала да сённешняга дня. 12 снежня яна вышла на заслужаны адпачынак.
У 2015 годзе Галіна Іосіфаўна Кажарновіч была прызнана “Чалавекам года” за ажыццяўленне шэрагу высакаякасных праектаў у горадзе і раёне і значны ўклад у развіццё Вілейскага раёна. Толькі за апошнія гады пад яе кіраўніцтвам былі ўвасоблены ідэі пераўтварэння цэнтральнай плошчы Вілейкі (рэканструкцыі будынкаў, будаўніцтва фантана, стварэнне ландшафтных кампазіцый і скульптурных элементаў), а таксама будаўніцтва новых мікрараёнаў, якія задалі планку якаснага развіцця нашага горада (мікрараёны Паўночны-2 і Паўночны-4).
Падрыхтаваў Сяргей ГАНЧАР
