20 жніўня чарговае свята пад назвай «Куточак, сэрцу дарагі» сустракала вёска Даўгінаўскага сельскага Савета з прыгожай назвай Чаромушкі.
Цёплым жнівеньскім днём творчы калектыў Язненскага СДК гасцінна сустракала ініцыятыўная група ўраджэнцаў Чаромушак пад кіраўніцтвам Раісы Сакалоўскай. Ля ўтульнага падворка Пяркоўскіх, які літаральна патанае ў квецені вяргінь, вяскоўцы змайстравалі святочную арку, стварылі ўмовы для выступлення самадзейных артыстаў і адпачынку гледачоў. А насупраць сцэнічнай пляцоўкі радавала вока прысутных выстава вышыванак мясцовых майстрых Веры Шаховіч і Людмілы Тонкавіч, вырабаў з бісеру Юліі Адамовіч і бібліятэкара Язненскай сельскай бібліятэкі Іны Лісіцы, таксама ўраджэнкі Чаромушак.
І закружыла святочная віхура. Пасля прывітальных слоў вядучая свята Альміна Кузьміч запрасіла да мікрафона дырэктара ААТ «Даўгінава» Яна Мінчыка, які добрымі словамі і падарункамі прывітаў перадавікоў сельскагаспадарчай вытворчасці — жыхароў вёскі Чаромушкі Уладзіміра Антановіча, Эдуарда Тонкавіча і Віктара Шаховіча. Старшыня Даўгінаўскага сельвыканкама Аляксандр Маліноўскі па традыцыі адзначыў лепшыя падворкі, руплівымі гаспадарамі якіх з’яўляюцца Адамовіч Данута Аляксандраўна , а таксама сям’я Машынскіх, уручыў падарункі самай сталай жыхарцы Сяліцкай Ядвізе Францаўне і самаму маленькаму жыхару Лазарэвічу Даніілу.
Знайшлося месца ў святочным сцэнарыі для ўшанавання юбіляраў 2016 года розных узростаў, сямейных пар, якія адзначылі юбілеі сумеснага жыцця. І для кожнага з іх знайшліся цёплыя словы, мілагучныя песні і падарункі, падрыхтаваныя калектывам Язненскага СДК пад кіраўніцтвам Аксаны Язневіч.
Цудоўнымі момантамі свята сталі музычныя нумары ад таленавітых жыхароў Чаромушак Канстанціна Машынскага, Вікторыі Кісялёвай, а таксама юных ураджэнцаў вёскі Сашы Тонкавіч і Пеці Ермаковіча.
У гэты дзень жыхары Чаромушак весяліліся ад душы і светла смуткавалі, успамінаючы пражытыя гады, дзяцінства, выказвалі чулыя словы пра сваю малую радзіму. Настаўнік Вілейскай гімназіі «Логас» Юрый Кузьміч заклікаў вяскоўцаў, іх дзяцей і ўнукаў берагчы родную вёску, наведвацца сюды як мага часцей і летам, і зімой, каб назва Чаромушкі не перакачавала на мемарыял зніклым вёскам, а існавала вечна. А Раіса Сакалоўская звярнулася да землякоў з пранікнёнымі вершаванымі радкамі:
Спазняемся вечна да роднае маці,
Дзе цёпла ад печы, утульна ў хаце,
Дзе водар мядовы сунічнагаранку,
Дзе помніць калыска яе калыханку.
Дарогі, вакзалы, гатэлі…
Як соладка спіцца ў роднай пасцелі!
Ад шумных кварталаў, ад тлумусталіцы
Спяшайцеся, дзеці,да маці ў святліцу,
Спяшайцеся, дзеці! Дай Бог не спазніцца…
Свята ў Чаромушках доўжылася да позняга вечара і прынесла мноства станоўчых эмоцый усім яго ўдзельнікам.
А мне ад імя членаў калектыву самадзейных артыстаў Язненскага СДК, які кожны год сумесна з мясцовай уладай працуе над такім важным і неабходным праектам, як свята вёскі, хочацца выказаць словы вялікай удзячнасці жыхарам вёскі Чаромушкі, вясёлым, дружным, таленавітым і шчырым людзям, дзякуючы якім традыцыйнае свята заззяла рознакаляровымі фарбамі, стала адметнай падзеяй летняга сезону 2016 і ўнесла сваю лепту ў такую шматгранную культуру нашай Беларусі.
Таццяна ЗУБЕЛЬ, удзельнік мастацкай самадзейнасці язненскага СДК.
Фота прадастаўлены аўтарам
