22 ліпеня 2014 года а 16 гадзіне ў Выставачнай зале Вілейскага музея адбудзецца адкрыццё персанальнай выставы мабільнай фатаграфіі Віталя Курдэка “На хвалях Піцер FM”.
Слушнасць маркетынгавага ходу стваральнікаў мабільных тэлефонаў — забеспячэнне іх фотакамерамі — пацвярджае велізарную колькасць здымкаў, якія размяшчаюцца ў сацыяльных сетках і інтэрнэце. Ніхто дакладна не ведае, колькі іх, гэтых мабільна спыненых імгненняў, але з кожным днём мабільных фатаграфій становіцца ўсё больш. Выкарыстоўваючы даступныя метады апрацоўкі, кожны можа стварыць свой шэдэўр і прадставіць, выкарыстоўваючы хэштэг, на суд ўсяму свету. І вось, мабілаграфія ўжо амбіцыйна прэтэндуе на самастойны кірунак у фотамастацтве, а значыць, гэты працэс нельга не адсочваць, выкарыстоўваючы для гэтага выставачныя прасторы.
У пачатку 2014 куратары інтэрнэт-тэлеканала ARTWAY.TV і арт-холдынгу Рахманінаў задаліся мэтай арганізаваць выставу артмабілаграфіі. Яны звярнулі свае погляды на сетку INSTAGRAM і абвясцлі конкурс, прапанаваўшы фатографу і куратару фотагалерэі «Рахманінаў Дворык» Юрыю Гурчэнкову, адабраць лепшыя працы. Выстава — конкурс у Пецярбургу ў фотагалерэі «Рахманінаў Дворык» прайшла з неверагодным поспехам і выявіла найбольш цікавыя творчыя імёны.
Лаўрэатам конкурсу стаў і наш зямляк Віталь Курдэка. Нястомныя пошукі ўласнага стылю ў мабілаграфіі, пацвярджаюцца выдатнымі здымкамі выкладзенымі ў яго акаунце.
Ураджэнец Вілейкі, Віталь Курдэка жыве і працуе ў горадзе на Няве. Ён улюбёны ў Санкт-Пецярбург не менш, чым у сваю родную Беларусь. Штодзённыя шпацыры, у вольны ад асноўнай працы час, у любое надвор’е з камерай мабільнага тэлефона далі вялікую колькасць цікавых здымкаў, сярод якіх аўтар выбраў лепшыя, з тым каб прадэманстраваць іх на выставачнай пляцоўцы Вілейскага музея.
Выстава будзе працаваць на працягу месяца з 22.07.2014 з 9.00 да 17.00. Выхадны: панядзелак. Тэл. 5-41-47.
