На працягу больш за два дзясяткі гадоў на Любаншчыне збіраюцца юныя тэатралы Міншчыны на адкрытым абласным фестывалі дзіцячай тэатральнай творчасці «Чароўны куфэрак». Напачатку ён задумваўся з мэтай прапаганды лепшых духоўных традыцый беларускага народа – адсюль і куфэрак, у якім, як вядома, здаўна захоўваліся самыя лепшыя, дарагія сэрцу рэчы. А чаму ён чароўны? Мусіць, таму, што невычарпальны. Як наша мова, культура, талент…
І адпачынкам, і вучобай, і эстэтычным задавальненнем, і сродкам самасцвярджэння, і выхаваннем назваў фестываль яго дырэктар Васіль Каткавец. Ён адзначыў, што фестываль не носіць ярка выражанага конкурснага характару, ён – свята, свята творчасці, сяброўскіх узаемаадносін. І нават кампетэнтнае журы пад старшынствам заслужанага артыста Рэспублікі Беларусь, дэкана тэатральнага факультэта Беларускай дзяржаўнай акадэміі мастацтваў, прафесара Уладзіміра Мішчанчука, – мудрыя дарадцы, а не суддзі. А глядацкае журы, якое ўзначальвала рэжысёр узорнага тэатра «ТэСт» з Маладзечна Таццяна Бабей, – проста старэйшыя сябры, вясёлыя і добрыя.
Сёлета гонар прадставіць Вілейшчыну на фестывалі выпаў дзіцячаму ўзорнаму тэатру «Ялінка» Нарачанскага сельскага Дома культуры. Кіруе калектывам Лілія Вахрушава. Юныя артысты падрыхтавалі казку сучаснага беларускага драматурга Сяргея Кавалёва «Хохлік». У ёй – пра братоў-гномаў, добрага і злога. Урэшце, гэта адвечная тэма – барацьба дабра са злом. І як важна ўбачыць тую дабрыню, часам глыбока схаваную за непрыкметнай знешнасцю… А як важна не памыліцца, не прыняць за светлае і чыстае знешні лоск, пад якім – анічога, акрамя пустаты, раўнадушша і нават злосці. Навучыць юных гледачоў разбірацца ў добрым і дрэнным, у людзях – вось галоўная мэта і аўтара казкі, і юных артыстаў «Ялінкі» Веранікі Балгарскай, Лізаветы Іларыёнавай, Надзеі Тумаш і Юланты Гайковіч, якія ігралі ў казцы. І ў іх усё атрымалася – дамоў юныя артысты і іх кіраўнік Лілія Вахрушава вярнуліся з цудоўным настроем, з планамі на будучае і з двума Дыпломамі – «За ўдзел у фестывалі» і «За самы добры спектакль» ад глядацкага журы.
– Мы ўпершыню ўдзельнічалі ў фестывалі, – адзначыла Лілія Вахрушава, – і выступілі даволі паспяхова. Таму ёсць стымул тварыць, імкнуцца да новых дасягненняў. І мы будзем гэта рабіць.
Што ж, поспехаў табе, «Ялінка»! Расці!
Ірына БУДЗЬКО
