Конкурс чытальнікаў, прысвечаны Году беларускай жанчыны, адбыўся у дзіцячым садзе № 4

Падрыхтоўка да мерапрыемства ішла сур’ёзна: разам з педагогамі і бацькамі юныя артысты вучылі вершы беларускіх класікаў і сучасных паэтаў, рыхтавалi касцюмы для выступу. Святочна ўпрыгожаная зала сустракала ўдзельнікаў і гасцей выявамі сініх азёр, бяскрайніх палёў і, вядома, вобразам жанчыны – берагіні роду, якую паэты часта параўноўваюць з зямлёй беларускай.

Адкрывалі конкурс самыя юныя ўдзельнікі — выхаванцы дзіцячага сада № 4. Нягледзячы на ўзрост, яны здзівілі гледачоў сваёй шчырасцю і выразнасцю. Гучна і з натхненнем гучалі радкі пра родную мову, пра маміны рукі i бабуліну крынiчку, пра шчаслiвае дзяцiнства.

Затым эстафету падхапілі вучні першых класаў гімназіі «Логас». Іх выступленні вызначаліся ўпэўненасцю і сапраўдным артыстызмам. Першакласнікі чыталі вершы пра родны край, пра яго слаўных жанчын-працаўніц і пра тое, як важна берагчы сваю спадчыну.

Асаблівую ўвагу прыцягнула інтэрактыўная гульня «Якая яна, беларуская жанчына?», якую правяла вядучая свята. Дзеці разам падбіралі самыя пяшчотныя словы: ласкавая, працавітая, прыгожая, як васілёк, з вачамі, чыстымі, як азёры. Між выступамі гучалі народныя прымаўкі і прыказкі, якія нагадвалі: «Жанчына — берагіня роду, а Радзіма — маці ўсіх маці».

Усе ўдзельнікі — ад самага малодшага да першакласнікаў — паказалі, што яны сапраўдныя сябры паэзіі. Кожны з іх атрымаў памятны дыплом. Але галоўным вынікам свята стала тое, што ў зале панаваў адзін дух — дух любові да сваёй зямлі, мовы і жанчыны, якая гэтую зямлю беражэ.

Сумесны конкурс чытальнікаў дзіцячага сада № 4 і вучняў гімназіі «Логас» стаў яскравым прыкладам сапраўднай сяброўскай сувязі пакаленняў. Ён паказаў, што паэзія аб’ядноўвае і дае нам магчымасць гаварыць пра самае галоўнае — пра Беларусь.