За два з паловаю – тры гады пяцігодку зробім, – упэўнена заявіў журналістам Пётр Пархомчык, генеральны дырэктар Беларускага аўтамабільнага завода. Інтэрв’ю давалася з нагоды знамянальнай падзеі ў жыцці сталічнага рэгіёну – цырымоніі ўшанавання лепшых яго людзей, прызнаных пераможцамі конкурсу «Чалавек года Міншчыны-2011». Пётр Аляксандравіч – адзін з іх.
– Мінулы год, падсумаваў вынік кіраўнік буйнейшага ў краіне прадпрыемства, – быў самым паспяховым у гісторыі развіцця БелАЗа. – Мы рэалізавалі прадукцыі больш чым на мільярд долараў. Гэта для нас рэкордная лічба. Параўнайце: 593 мільёны ў 2008-ым з цяперашнім мільярдам. Тэмп росту вытворчасці – таварнай прадукцыі і экспарт выраслі ў паўтара разы. – І яшчэ адну ўражальную перспектыву развіцця БелАЗа, што не з’яўляецца ўжо камерцыйнай тайнай, акрэсліў генеральны дырэктар акцыянернага таварыства: рыхтуецца да выпуску ўзор самага вялікага ў свеце кар’ернага самасвала грузападымальнасцю ў 450 тон. Інфармацыя гэта, у першую чаргу, для сцептыкаў, якія ставяць пад сумненне наша развіццё, спасылаючыся пры гэтым на праявы крызісу, што захліснуў сусветную эканоміку. Толькі ёсць сярод гэтых праяў такія вось аазісы паспяховасці і тым больш прыемна, што на нашай Міншчыне яны не адзінкавыя. Сярод пераможцаў конкурсу – Мікалай Радаман, старшыня вядомага ў краіне агракамбіната «Сноў». Вядомага больш не сваімі эканамічнымі паказчыкамі (яны – не ў сферы дылетанцкага інтарэсу), а прадукцыяй, якую мы бачым на паліцах практычна ўсіх прадуктовых крам. Перапрацоўчая галіна ў «Снове» знаходзіцца, здаецца, на піку свайго развіцця. Мясныя і каўбасныя вырабы, паўфабрыкаты, вырабленыя згодна патрабаванняў дзяржстандарту з натуральнай сыравіны, карыстаюцца заслужана шырокім попытам і заўсёды запатрабаваныя ў спажыўца. Аўтару гэтых радкоў пашчасціла летась наведаць агракамбінат у складзе групы спецыялістаў райсельгасхарчу. У мяне, напрыклад, гэта была першая сустрэча з Мікалаем Радаманам і першае знаёмства з сельгаспрадпрыемствам такога ўзроўню. Уразіла сама асоба кіраўніка. Высокая кампетэнтнасць, дасведчанасць суседнічалі ў ёй з адкрытай даверлівасцю, павагай да магчыма менш удачлівых калег. Даўно заўважана: чым вышэй вартасць чалавека, тым прасцейшы ён у абыходжанні, даступнасці, тым далікатней прэзентуе сваё «я», праецыруючы яго на фон агульнага поспеху калектыву, у якім ён іграе вядучую партыю.
Сказанае можа аднесці і да Сяргея Ульдзіновіча, дырэктара Копыльскага лясгаса. Па выніках работы за апошнія тры гады гаспадарка трывала займае першае месца ў рэйтынгу сярод аналагічных арганізацый галіновага міністэрства. Практычна напалавіну мінулагоднія экспартныя пастаўкі пераўзыйшлі паказчык 2010 года.
– Не скажу, што робім нешта выключнае, – заўважыў, адказваючы на пытанні журналістаў, Сяргей Станіслававіч. – Проста калектыў жадае быць паспяховым і з такім настроем працуе. Мы летась змаглі направіць больш чатырох мільярдаў рублёў інвестыцый у асноўны капітал, на 50 працэнтаў перакрыўшы свае першапачатковыя планы.
Усяго дваццаць прадстаўнікоў сталічнага рэгіёну ўдастоены ганаровага звання «Чалавек года Міншчыны 2011». Пераможцаў выбіралі ў трох намінацыях: вытворчая і грамадска-палітычная дзейнасць, невытворчая сфера. Прэтэндэнты, згодна ўмоў конкурсу, павінны ўнесці асабісты ўклад у рэалізацыю ідэй, найбольш эфектыўных для эканомікі і сацыяльнай сферы Міншчыны, развіцця яе духоўнага пантэнцыялу. Урачыстая цырымонія ўзнагароджання праходзіла 16 сакавіка ў цэнтры культуры Мар’інай Горкі Пухавіцкага раёна. Пад гукі духавога аркестра заходзілі яе ўдзельнікі ў глядзельную залу. А ў фае арганізатары наладзілі выставу кніг, надрукаваных у выдавецтве «Беларуская энцыклапедыя». Прэзентацыю выданняў, якія адлюстроўваюць культурную і духоўную спадчыну Беларусі, яе сучасныя набыткі, ствараюць той своеасаблівы імідж, які служыць рэйтынгу папулярнасці краіны ў геапалітычнай прасторы, правяла дырэктар выдавецтва Таццяна Бялова. Перад пачаткам урачыстай цырымоніі ўзнагароджання пераможцаў выставу наведаў старшыня абласнога выканаўчага камітэта Барыс Батура. Ён з цікавасцю агледзеў прэзентацыйныя выданні, належным чынам ацаніўшы ўзровень іх паліграфічнага і мастацкага афармлення.
І ўжо ў зале, звяртаючыся да прысутных, кіраўнік абласной выканаўчай улады адзначыў важнасць таго мерапрыемства, якое сабрала на Пухаўшчыне прадстаўнікоў усяго сталічнага рэгіёна. Бо менавіта ён з’яўляецца сэрцам Беларусі і задае тон жыцця ўсёй краіны:
– Гэта прэстыжная прэмія. Яна – прызнанне асаблівых заслуг працаўнікоў Міншчыны, тых, хто ўносіць найбольшы ўклад у яе развіццё. Наяўнасць інавацыйных ідэй, укараненне сучасных тэхналогій, грамадска-палітычная дзейнасць, – усё гэта ўлічвалася пры падвядзенні вынікаў.
Барыс Батура спыніўся на важнейшых паказчыках сацыяльна-эканамічнага развіцця вобласці, зазначыўшы, што тэмп росту валавога ўнутранага прадукту склаў за мінулы год 106,6 працэнта, што апераджальнымі тэмпамі развіваецца прамысловая галіна. А ў структуры эканомікі прыярытэты змяшчаюцца ў бок яе недзяржаўнага сектару. Міншчына робіць стаўку на малы і сярэдні бізнэс. Ставіцца задача сёлета давесці яго ўклад у кансалідаваны бюджэт вобласці не менш чым да 50-ці працэнтаў. Менавіта прадпрымальніцкая дзейнасць здольна забяспечыць важнейшыя ўмовы эканамічнага росту: занятасць насельніцтва, яго працоўную актыўнасць. Фарміраванне сярэдняга класа ўласнікаў – гарантыя палітычнай стабільнасці ў краіне.
Як прыклад інавацыйнага развіцця – інвестыцыйныя праекты. Па агульнаму аб’ёму інвестыцый у эканоміку Міншчына бачна апераджае астатнія рэгіёны краіны.
Адзначыў губернатар і паступальны рост аб’ёмаў сельскагаспадарчай вытворчасці. Галіной за мінулы год атрыманы прыбытак у памеры 700 мільярдаў рублёў.Сёлета тэмпы роста будуць забяспечвацца за кошт аптымізацыі пасяўных плошчаў, укаранення новых тэхналогій у жывёлагадоўлі. Вобласць рэалізуе праект рэканструкцыі малочна-таварных фермаў з узвядзеннем даільных залаў.
– Плануем не для лічбаў, а для забеспячэння харчовай бяспекі краіны і яе экспартнага патэнцыялу… Ушаноўваючы лаўрэатаў, спадзяемся, што гэтыя людзі стануць прыкладам для іншых. Віншуючы лепшых, мы разам з імі віншуем тыя калектывы, якія яны прадстаўляюць, – зазначыў Барыс Батура. – У адзіночку немагчыма дабіцца такіх уражальных поспехаў.
… А пасля ўручэння спецыяльнай прэміі аблвыканкама адбыўся святочны канцэрт. Дзяржаўны каледж мастацтваў, самадзейныя артысты з розных рэгіёнаў Міншчыны выкарысталі магчымасць бліснуць сваімі талентамі перад такой прадстаўнічай аўдыторыяй. І гэта было сапраўды захапляючае відовішча, вартае тых людзей, якія састаўляюць залаты фонд сталічнага рэгіёну.
Марыя КУЗАЎКІНА.
Фота аўтара
