Вельмі сімвалічным стала папаўненне кніжнага фонду Вілейскай раённай бібліятэкі «Кампендыем сацыяльнага вучэння Касцёла». Гэта выданне мы атрымалі па даручэнні арцыбіскупа Тадэвуша Кандрусевіча, Мітрапаліта Мінска-Магілёўскага. У суправаджальным пісьме за подпісам высокага святара адзначана, што галоўная мэта «Кампэндыя» – «дапамагчы ў маральным і пастырскім пазнаванні складаных з’яў сучаснасці, прадставіць вернікам сацыяльную дактрыну ў галіне грамадскай маральнасці». Кніга адкрыта людзям добрай волі і іншых веравызнанняў, асабліва падкрэслена блізкасць пазіцый каталіцкай і праваслаўнай Царквы па сацыяльных пытаннях.
Кампендый быў падрыхтаваны Папскай радай «Justitia et Pax». У ім упершыню былі сістэматызаваныя і ўніфікаваныя галоўныя ідэі сацыяльнага вучэння Каталіцкага Касцёла, пачынаючы ад энцыклікі папы Льва ХІІІ «Rerum novarum»‘, абнародаванай у 1895 годдзе, да сучаснага навучання Касцёла.
Выдадзены «Кампендый сацыяльнага вучэння Касцёла» на беларускай мове. Кніга падрыхтавана да друку выдавецтвам «Про Хрысто» у 2011 годзе. 23 лістапада Бенедыкт XVI прыняў каталіцка-праваслаўную дэлегацыю. Мітрапаліт Тадэвуш Кандрусевіч, які ўваходзіў у склад дэлегацыі, перадаў Папу гэту кнігу на беларускай мове.
Кампендый складаецца з уводзінаў, трох частак і заканчэння. У ім прадстаўлены галоўныя прынцыпы сацыяльнага вучэння, а менавіта: годнасць чалавечай асобы, агульнае дабро, прынцып субсідыярнасці і салідарнасці (субсідыярнасць (ад лат. Subsidiarius – дапаможны) – арганізацыйны і прававы прынцып, згодна якому задачы павінны рашацца на самым нізкім, малым або аддаленым ад цэнтра ўзроўні, на якім іх рашэнне магчыма і эфектыўна. Згодна субсідыярнасці, улада павінна быць як мага бліжэй да грамадзян).
З тэкстам Кампендыя сацыяльнага вучэння Касцёла можна пазнаёміцца ў чытальнай зале раённай бібліятэкі, а таксама на www.catholic.by у раздзеле «Секцыя па перакладзе літургічных тэкстаў і афіцыйных дакументаў Касцёла».
Падрыхтавала Ганна ГЕРКО
