Завяршыўся юбілейны дваццаты Нацыянальны фестываль беларускай песні і паэзіі «Маладзечна-2021», які з’яўляецца адным з найбольш значных і чаканых мерапрыемстваў у культурным жыцці горада.
Доўгі час маштабны форум збірае таленавітых паэтаў, выканаўцаў, кампазітараў, майстроў, адкрывае і запальвае новыя зоркі на беларускім творчым небасхіле. Так, два дні, 11 і 12 чэрвеня, насычаная святочная праграма радавала жыхароў і гасцей горада. Працавалі экспазіцыі дэкаратыўна-прыкладнога мастацтва і народнай творчасці як нашага, так і іншых раёнаў. Першы фестывальны дзень пачаўся з падарожжа па старонках фестывальнай гісторыі, якое адбылося ў выставачным фае Палаца культуры падчас адкрыцця выставы «Фестываль. Духоўнасць. Культура».
Нацыянальны конкурс маладых выканаўцаў беларускай эстраднай песні з’яўляецца неад’емнай часткай творчага форуму. Так, маладыя выканаўцы прадэманстравалі свой талент і падчас II і III тураў рэспубліканскага конкурсу маладых выканаўцаў беларускай эстраднай песні, а апошні ў суправаджэнні заслужанага калектыву Рэспублікі Беларусь “Нацыянальны акадэмічны канцэртны аркестр Беларусі” пад кіраўніцтвам народнага артыста Беларусі прафесара Міхаіла Фінберга. Для дзяцей малодшага ўзросту ў Мінскім абласным тэатры лялек “Батлейка” адбыўся спектакль “Казкі з куфэрка”. Шмат жадаючых прысутнічала на персанальнай выставе ”Спявак культуры края” майстра Аляксандра Фінскага, вядомага ў галіне манументальнай скульптуры. Цікавы і душэўны праект “Асоба эпохі” арганізаваў у гэтым годзе творчую сустрэчу з народнай артысткай Беларусі Анастасіяй Масквіной.
Менталітэт тагачасных беларусаў быў адлюстраваны ў спектаклі “На другі дзень Сёмухі”. Апагеем мерапрыемства стала ўрачыстае адкрыццё фестывалю на сцэне летняга амфітэатра. Падчас канцэрта адбылася ўрачыстая цырымонія ўзнагароджання лаўрэатаў Нацыянальнага конкурсу маладых выканаўцаў беларускай эстраднай песні. Жыхароў і гасцей горада чакала прэм’ера канцэрта «Талака», прысвечанага творчасці класіка беларускай літаратуры Уладзіміра Караткевіча і майстра беларускай песні Ігара Паліводы, у выкананні заслужанага калектыву Рэспублікі Беларусь «Нацыянальны акадэмічны аркестр Беларусі». У гонар дваццатага юбілею завяршэннем першага святочнага дня стаў феерверк.
Другі дзень фестывалю пачаўся з канцэрта акадэмічнай музыкі творчых калектываў заслужанага калектыву пад кіраўніцтвам Міхаіла Фінберга. Адбыліся спектаклі, гала-канцэрт “Маладзічок” запальвае зоркі”, аўтарскі праект “Суразмоўцы” і творчы “Сімфанічная рапсодыя”. На паэтычнай пляцоўцы выступілі народны калектыў аўтарскай песні “Элегія” Вілейскага цэнтра эстэтычнага выхавання і народны калектыў эстраднай студыі аўтарскай песні “Імпэт”, таксама нашы вядомыя землякі паэты Віктар Кажура (вядучы) і Уладзімір Цанунін. А ўвечары ў летнім амфітэатры прайшоў канцэрт-закрыцццё XX Нацыянальнага фестывалю беларускай песні і паэзіі “Маладзечна-2021”. Жыхары і госці горада атрымалі асалоду ад юбілейнай канцэртнай праграмы “Маладзечна – насустрач шлягерам” з удзелам зорак беларускай эстрады, пераможцаў конкурсу маладых выканаўцаў розных гадоў.
Падчас правядзення святочнага мерапрыемства жыхары і госці Маладзечна падзяліліся ўражаннямі.
Наталля Сабалеўская, маладзечанка:
– Толькі станоўчыя, усё выдатна. І дзецям ёсць дзе разысціся, і па цане ўсё прымальна. Надвор’е гэтаму спрыяе. Усе вельмі добразычлівыя, прыязныя. Вельмі прыгожыя статуі анёлаў, раней іх не было. Такія фестывалі мы вельмі вітаем, асабліва таму, што ў гэтыя дні для дзяцей прадастаўлена вялікая колькасць забаўляльных пляцовак. Вельмі спадабаўся гала-канцэрт «Маладзічок запальвае зоркі», на якім сёння пабывалі. Вось і цяпер прысутнічаем на майстар-класе па аквагрыме.
Навучэнцы гімназіі-школы мастацтваў г. Маладзечна Анастасія РАДЗІВІЛОВІЧ:
– Вельмі весела. Так шмат усяго: і сфатаграфавацца, і паесці дзе. Мне больш за ўсё падабаюцца высокія статуі на мерапрыемстве.
…і Арцём ЧАРНЫШОЎ:
– У пятніцу я таксама прысутнічаў на фестывалі: дапамагаў сваім бацькам прадаваць саламяныя вырабы, у іх тры гандлёвыя кропкі. А сёння адпачываю з сябрамі, будзем гуляць да ночы, пакуль не стомімся. Я ў захапленні ад святочнай атмасферы, паўсюль выступленні артыстаў некалькіх абласцей нашай краіны. Добры фестываль і людзі вельмі добрыя, увогуле, класна!
Супрацоўнікі Крупіцкага цэнтра культуры імя У.М. Грома Анастасія ШПАК, аўтар фітагабелена:
– У Маладзечне мы ўпершыню. Скажу так: Маладзечна – гэта «маскоўскі Арбат», асабліва ўвечары. Тут такая прыемная атмасфера. У першы раз на мерапрыемстве мы не стаміліся, а адпачылі. Такія фестывалі павінны быць!
Яе калега Ірына ДЗЕРНАКОЎСКАЯ дапаўняе:
– Як адна сям’я, маем зносіны з усімі на роўных. Выдатна! Думаю, калі б гэта не падабалася, мерапрыемства было б незапатрабаваным. А тут столькі людзей, гасцей горада! Трэба рабіць такія мерапрыемствы, у гэтым наша адзінства. Асабліва, калі ўсе датыкаюцца да вырабаў нашага цэнтра – паясоў, экалагічных, чыстых і натуральных фітагабеленаў з аеру, травы і кветак. Не меншае здзіўленне адчуваем, калі людзі розных узростаў пытаюцца, што гэта. Не многія ведаюць, што нашы дзядулі і бабулі пастаянна выкарыстоўвалі гэтую сухую траву ў сваіх дамах у мэтах дэзінфекцыі ад шкоднікаў.
Анастасія КУХТА, кіраўнік студыі ткацтва «Лянок» Старадарожскага Дома рамёстваў:
– Усё спадабалася, усё так жвавенька і актыўна. Тут я ўпершыню. Маштабы мерапрыемства ўражваюць, вядома. Абавязкова пойдзем на гала-канцэрт закрыцця юбілейнага фестывалю.
Вікторыя КЛІМОВІЧ, старшыня прафсаюзнай арганізацыі Вілейскай ЦРБ:
– Тут са сваёй сям’ёй, увечары пойдзем на закрыццё. Цяпер былі на спектаклі «Паўлінка». Вядома, людзям трэба адпачываць. Ад усяго ўбачанага ў нас добрыя эмоцыі. Больш падабаецца ненапружаная атмасфера, можна расслабіцца і спакойна адпачыць. Тут проста маеш зносіны, гуляеш з сям’ёй і сябрамі.
Анастасія БУРАК, маладзечанка:
– Кожны год усёй сям’ёй з сябрамі стараемся хадзіць на фестываль. Уражанні толькі самыя добрыя. Шмат забаў для дзетак, усё даступна. Думалі, людзей нават будзе менш. У цэлым, усё вельмі добра.
Аляксандра АНДРЭЕВА, галоўны спецыяліст Маладзечанскага РК ГА «БРСМ»:
– Уражанні самыя выдатныя. Мы займаемся папулярызацыяй дзяржаўных сімвалаў. Вось і ў такой сяброўскай цёплай атмасферы ў нас праходзіць акцыя «Родныя народы». Мы рады бачыць і прымаць гасцей у нашым горадзе і спадзяёмся, што ім будзе тут камфортна. Кожны год у нас праходзіць фестываль. Нам падабаецца тое, што ў Маладзечне развітая культура. А самае прыемнае, што такое маштабнае мерапрыемства аб’яднала жыхароў з розных раёнаў і абласцей. Мы, БРСМ, – за адзінства.
Алена ЛАЕЎСКАЯ, выхавальнік ясляў-сада №8 Вілейкі:
– Упершыню сям’ёй прыехалі на юбілейны фестываль. У нас толькі пазітыўныя эмоцыі. Бачым, як весела цяпер людзі праводзяць час на канцэрце, што зараз на Цэнтральнай плошчы праходзіць. Увогуле, можна добра адпачыць. Думаю, і на гала-канцэрце закрыцця фестывалю, на які мы спецыяльна прыехалі, атрымаем станоўчыя, яркія эмоцыі.
«Беларуская зямля заўсёды славілася сваімі краявідамі, добрымі і працавітымі людзьмі. Хто аднойчы пабываў тут, не можа застацца абыякавым. Прыязджайце да нас ,у Беларусь, у Маладзечна, прыязджайце насустрач шлягерам» – такімі словамі закончылася праграма XX Нацыянальнага фестывалю беларускай песні і паэзіі, якія, здаецца, кранулі сэрца кожнага з прысутных. Да сустрэчы, Маладзечна!
Вікторыя АПЯЦЁНАК. Фота аўтара
