Штогод у трэцюю лістападаўскую нядзелю прафесійнае свята адзначаюць усе тыя, хто забяспечвае харчовую бяспеку нашай краіны – работнікі сельскай гаспадаркі і перапрацоўчай прамысловасці аграпрамысловага комплексу.
Усяго ў сельскай гаспадарцы Беларусі занятыя больш за 330 тысяч работнікаў, якія працуюць, каб накарміць краіну. У Вілейскім раёне гэта лічба перавышае 2 400 чалавек. Дзень работнікаў сельскай гаспадаркі і перапрацоўчай прамысловасці – гэта свята ўсіх тых, хто апрацоўвае зямлю, даглядае за жывёлай, перапрацоўвае збожжа і малако, а таксама тых, хто працуе ў лабараторыях і ў іншых установах АПК.
– Не кожны чалавек здольны працаваць на вёсцы, бо праца сельскіх працаўнікоў вельмі няпростая і цяжкая, – адзначыў у сваім віншаванні старшыня Вілейскага райвыканкама Алег Бегунец падчас ўручэння грамат і падзяк рознага узроўню ў ААТ «Нарачанскія зоры». – Хочацца падзякаваць кожнага з вас, бо, як вядома, – адзін работнік, што працуе на вёсцы, дае работу 7 работнікам ў горадзе. Вы сваім руплівым гаспадарскім стаўленнем да даручанай справы, адказнасцю ствараеце належныя ўмовы для развіцця аграпрамысловага комплексу не толькі нашага раёна, але і краіны. Адна з самых нялёгкіх прац вырошчваць хлеб, вырабляць мяса і малако, а вынікі гэтай працы знаходзяць месца на сталах нашых віляйчан і беларусаў. Наша сельская гаспадарка знаходзіцца на высокім ўзроўні. Вытворчасць сельскагаспадарчай прадукцыі ў нас у раёне вырасла на 118% за 9 месяцаў 2020 года. Нізкі паклон усім работнікам сельскай гаспадаркі і асабліва ветэранам, перадавікам вытворчасці за самаадданую і добрасумленную працу.
У гэтыя перадсвяточныя дні у кожнай гаспадарцы раёна і на кожным пераапрацоўчым прадпрыемстве пабывалі прадстаўнікі раённай адміністрацыі, каб уручыць заслужаныя ўзнагароды перадавікам вытворчасці. На жаль, у гэтым годзе вялікага свята ў Вілейскім Палацы культуры не адбылося, не дазваляе эпідэміялагічная сітуацыя.
У мінулы чацвер свае віншаванні работнікам вілейскага ўчастка Маладзечанскага малочнага камбіната адрасаваў першы намеснік старшыні райвыканкама – начальнік упраўлення па сельскай гаспадарцы і харчаванні Анатоль Завацкі. Віншючы завадчан, Анатоль Мікалаевіч адзначыў, што вілейскі ўчастак малочнага камбіната ўжо перасягнуў няпростую сітуацыю з аб’емамі вытворчасці. Зараз на заводзе вырабляюць масла, для чаго быў набыты новы апарат, а таксама тварог, казеін. Ужо выраблена пробная партыя новага сыру з белай цвіллю “Каламбэр”. Завод працягвае развівацца і асвойваць новыя лініі прадукцыі. Нездарма каля дзясятка работнікаў прадпрыемства атрымалі напярэдадні прафесійнага свята ўзнагароды раённага і абласнога ўзроўняў.
Сяргей ГАНЧАР/Фота аўтара
